Ginkumpirmar sang director sang Bacolod City Police Office nga igalubong na subong nga adlaw si Police Staff Sergeant Joseph Nepomuceno sa Palm Haven, Barangay Estefania, Bacolod City.
Madumduman nga si Nepomuceno ang ginluthang-patay sang Agosto 29 sa Barangay 38 syudad sang Bacolod.
Sa interview sang Bombo Radyo kay BCPO Director Police Col. Manuel Placido, ginpahayag sini nga magapatigayon sang 21 gun salute kag pagahatagan sang tribute si Nepomuceno alas 10:00 sang aga subong nga adlaw.
Kagab-i, nagpadulong si Placido sa balay kun sa diin nakahaya ang bangkay ni Nepomuceno kag nag-istorya sa pamilya natuhoy sa impormasyon sa interment.
Magatambong man ang mga personnel sang BCPO sa patigayunon nga tribute.
Ginpakigbahin man sang city director nga tubtob sa karun, wala pa sang development ang kaso ni Nepomuceno.
