Ginahanda na sang Women and Children’s Protection Desk ang kaso nga ipasaka batok kay Police Staff Sgt. Harry Gonzaga nga nangastigo sang duha ka menor de edad sa Purok Mabini, Barangay 30, Bacolod City sang Hulyo 10 sang gab-i.
Suno kay Police Capt. Christine Cerbo, acting head sang Women and Children’s Protection Desk sang Bacolod City Police Office, ang WCPD sang Bacolod Police Station 6 ang nagahandle sang kaso.
Subong nga adlaw, magapadulong sa Police Station 6 ang duha ka menor de edad kag ila nga guardian agud nga maka-execute sang affidavit agud nga mafile ang kaso sa Lunes.
Si Gonzaga ang kasuhan sang physical injury in relation to RA 7610 ukon An Act Providing For Stronger Deterrence And Special Protection Against Child Abuse, Exploitation And Discrimination, And For Other Purposes.
Suno kay Cerbo, wala ginatolerar sang WCPD ang pagpanakit sang mga pulis sa mga menor de edad gani atubangon sang respondent ang nagakaigo nga kaso.
Panugyan sang WCPD head, manumdom sang makapila ka beses antes maghimo sang kaangay nga bagay bangud indi na mapabalik ang oras.
Suno diri, mahimo nga nadala ang pulis sang iya emosyon bangud nabuka ang windshield sang iya nga salakyan gani nakastiguhan niya ang kabataan.
Nagpanugyan naman ang female police sa mga ginikanan nga giyahan sang maayo ang mga kabataan agud nga mangin maayo ang ila pamatasan kag makapauli sang temprano.
