Wala sa gihapon sang lead ang Bacolod Police Station 1 sa kun sin-o ang nagkawat sang control panel sang traffic light sa intersection sang Dalan Lizares kag Dalan Lacson.
Suno kay Police Major Elmer Bonilla, station commander sang Bacolod Police Station 1, magahatag sila sang investigation report sa Bacolod Traffic Authority Office tuhoy diri kag ang BTAO ang magasubmit naman sini sa alkalde sang ciudad para sa rekomendasyon.
Suno kay Bonilla, wala sila sa gihapon sang lead bangud gab-i natabo ang insidente, wala sang witness kag wala nagafunction ang closed-circuit television camera sa lugar.
Gani sa karun nagapabilin nga under investigation ang ini nga kaso.
Suno sa iya, wala man sang balor ang panel board kun ipascrap gani kabahin man sang ila imbestigasyon kun ngaa ini ang ginakawat.
Sang damlag lang, naghingyo si Police Major Junji Liba, pinuno sang BTAO nga madugangan sang bag-o nga set sang traffic lights ang ciudad.
Suno kay Liba, sa 28 ka mga traffic light sa ciudad, 26 lamang ang nagafunction bangud ang isa amu ang naguba sa Lizares-Lacson Streets kag ang isa naman ang nahamtang sa Bacolod Police Station 6 kag wala ginagamit.
