Ginkumpirmar sang station commander sang Bacolod Police Station 2 nga suspetsado si Arian Mark Salaver sa pila ka insidente sang hold-up kag akyat-bahay sa ciudad sang Bacolod antes ini ginpatay sa Purok Cabacawan, Barangay Villamonte, Pebrero 9 sang gab-i.
Sa interview sang Bombo Radyo kay Police Capt. Paul Vincent Pendon, indi pa matumod kun nag-avail si Salaver sang plea bargaining agreement ukon natapos sini ang pagserbe sa sentensya sa kaso nga violation sang Republic Act 9165 ukon Comprehensive Dangerous Drugs Act of 2002.
Santo sa archives sang Bombo Radyo Bacolod, si Salaver ang nadakpan sa drug buybust operation sang Enero tuig 2017 sa Purok Sigay, Barangay 2 kun sa diin nakuhaan ini sang pito ka sachets sang suspected shabu.
Santo sa rekord sang Police Station 2, tinalikdan nga tuig lang nakagwa sa prisuhan si Salaver kag nagbalik sa illegal nga buluhaton.
Suno sa intelligence community, isa si Salaver sa mga suspects sa hold-up, akyat-bahay, kag shooting incident base man sa deskripsyon nga ginahatag sang mga witness.
May nagapanugid man nga siga si alyas Jokjok sa Purok Kagaykay kag Purok Sigay, Barangay 2 kun sa diin ginahold-up niya ang nagasulod nga pangayaw nga nagabakal sang druga.
Sa karon, wala sang standing warrant of arrest si Salaver sa Police Station 2 bangud wala sang biktima nga pursigido nga magpasaka sang kaso apang nakasuhan ini sang Police Station 7 sang robbery kag wala pa nakagwa ang warrant of arrest.
Ginalantaw ni Pendon nga mahimo nga nagahipos lang ang mga biktima nga iya gindaog-daog bangud nahadlok nga balikan ukon halitan ang ila nga pamilya apang subong na nagtimalos.
