May yara na sang persons of interest ang Bacolod City Police Station 3 kaangot sa nagpatay sa Muslim nga negosyante nga si Ontao Sacar.
Sa interview sang Bombo Radyo kay Bacolod City Police Office spokesperson Police Lieutenant Colonel Ariel Pico, duha tubtob tatlo ka mga persona ang ginatutukan sang mga kapulisan nga nag-abduct kag nagpatay sa biktima.
Suno kay Pico, wala ginadula nga may kaangtanan sa iligal nga druga ang motibo sa pagpatay kay Sacar apang kinahanglan pa nga e-validate ang report tuhoy diri.
Samtang wala na ginpa-autopsy sang pamilya kag kaupdanan sang biktima ang bangkay sini bangud man sa tradition nga ila gina-sunod kun sa diin dapat malubong na ini sa sulod sang 24 oras matapos magtaliwan.
Suno BCPO spokesperson , tainguhaan nila nga masolbar ang kaso kag wala man sila nagatolerar sang kaangay sini nga pagpatay.
Madumduman nga alas-6:00 sang aga, Martes nga adlaw sang nasapwan ang biktima nga ginputos sang packing tape ang baba kag guya sini, may nakasulat nga “I love drugs” sa iya nga tiyan kag may smiley pa kag nakita man sa iya tupad ang placard nga “Huwag tularan bigtime pusher ako”.
Una ini nga gin-abduct sang armado nga mga kalalakihan nga nakasakay sa pula nga van samtang sila ang nagalakat sang iya asawa, Lunes sang gab-i sa Mambuloc, Brgy. 10.
