Yara sa high alert status ang tanan nga Police Stations sa Negros Occidental Police Provincial Office sa posibilidad sang retaliatory attacks sang makawala nga grupo.
Ini matapos sang mga asod-asod nga military operations batok sa rebelde nga New People’s Army partikular na sa banwa sang Toboso kun sa diin 19 ka mga NPA members ang napatay, may lima nga nadakpan sa Talisay City, kasubong man ang engkwentro sa Canlaon City, Negros Oriental, kag ang damlag lang nga engkwentro sa banwa sang Cauayan.
Sa interview sang Bombo Radyo Bacolod kay Police Captain Judesses Catalogo, ginpahanumdom nila sa personnel sa Southern man ukon sa Northern Negros nga mangin alerto parikular na sa mga kapulisan nga nagagwa.
Suno diri, may-ara sila sang ginapatigayon nga mga Community works.
Nahibaluan nga matapos lamang ang engkwentro sa Toboso, may-ara sang biktima nga ginpatay sa sulod sang iya balay sa Sipalay City, kag ang pagpatay ang gin-ako sang NPA.
Gani wala ginadula ang posibilidad nga kasunod sang dako nga kapierdihan sang NPA batok sa militar, sila ang magabalos paagi sa pag-atake sa mga law enforcement units.
