Ginkumpirmar ni Bacolod City Police Office spokesperson P/Lt. Col. Ariel Pico nga yara na sa kustodiya sang Regional Personnel Holding and Accounting Unit ang anom ka police trainees nga nadakpan nga nagapahubog sa Sara, Iloilo.
Sa interview sang Bombo Radyo Bacolod kay Pico, ginpahayag sini nga temporaryo nga naga-duty sa headquarters karon ang anom ka mga babayi nga police trainees samtang nagahulat nga pasakaan sang criminal kag administrative cases.
Ginhatagan naman ang mga ini sang lima ka adlaw agud nga makapasa sang affidavit para sa pre-charge investigation.
Suno kay Pico, siya mismo ang dismayado pagkabati niya sang amo nga balita bangud mismo ang mga nagapatuman pa sang layi ang wala nagasunod sa health protocols.
Suno sa tagpamaba, wala dapat sang dampigan diri kag wala sang exempted sa pagsunod sa health protocols subong nga may pandemic.
Nagalaom naman ini nga indi na masulit pa ang natabo kag makuhaan sang leksyon sang iban nga mga pulis.
Nahibaluan nga una na nga gin-terminate sa Basic Internal Security Operations Course training sanday Patrolwoman Jean Tiongco, 25 anyos; Patrolwoman Jeseel Cordivito, 26 anyos; Patrolwoman Ma. Lorena Semilla, 26 anyos; Patrolwoman Rose May Ogboc, 21 anyos; Patrolwoman Shane Grijaldo, 26 anyos kag Patrolwoman Pearl Joy Araneta, 25 anyos nga lunsay tumandok sang Negros Occidental.
