Nagapati ang political analyst political gimmickry ukon advance campaigning na ang mga pulupabati ni former Senator Antonio Trillanes IV.
Sa interview sang Bombo Radyo Bacolod kay Atty Jomax Ortiz, maathag na nga wala sang tyansa kun magapadalagan bilang Presidente sa 2028 si House Speaker Martin Romualdez.
Bangod sini, hinali nga nagtipyok si Trillanes.
100 porsyento ang pagpati ni Ortiz nga magapapili sa higher office si Trillanes nga mahimo bilang Bise Presidente, samtang ginaduso naman sini nga mangin tandem bilang Presidente si Senator Risa Hontiveros.
Apang suno kay Ortiz, ang mga politiko nga yara sa tunga tunga ukon indi man pro Marcos kag indi man pro Duterte, ang ginalantaw nga magaduso kay Naga City Mayor Leni Robredo bilang Presidente ukon Bise Presidente.
Samtang nagapati man si Ortiz nga may lamod politika ang pagbisita sadto ni Vice President Sara Duterte kay Robredo, kag ini ang ginatuyo nga himuon niya nga tandem sa 2028 Elections.
Pahanumdom sang abogado nga sadto antes magpapili, nagkitaay man sanday Vice President Sara Duterte kag President Ferdinand “Bongbong” Marcos Jr sa Cebu.
Suno kay Ortiz, una nga ginduso ni former President Rodrigo Duterte nga magpapili bilang Presidente si VP Sara, apang matapos ang meet-up, ini ang nagtandem kay Marcos.
Gani nagapati ini nga sa pagbisita ni VP Sara kay Robredo, ginahikutar naman sini nga makatandem ang anay Bise Presidente.
Ini man ang nakita nga rasun ni Ortiz, kun ngaa ginapabati-batian naman ni Trillanes si Robredo, agud mapunggan ang Sara-Leni tandem, sa baylo ginatinguhaan nila nga makuha si Leni.
Sa pihak nga bahin, kun indi mangin tandem ni VP Sara si Leni, nagadako man ang tyansa ni Senator Rodante Marcoleta bangod sa mga ginpakita sini nga maayo nga performance.
Aminado si Ortiz nga bisan na mantsahan ang pangalan ni VP Sara sa issue angot sa misuse sang budget, dako gihapon ang porsyento sang mga nagapati sa iya, nga nakita sa nangin resulta sang 2025 Elections.
