Ginpahayag sang political analyst sa ciudad sang Bacolod nga may yara sang epekto sa pila ka mga pungsod kalakip na sa Pilipinas ang pagpatuman sang Estados Unidos sang taripa sa madamo nga pungsod kag isa na diri ang China.
Sa interview sang Bombo Radyo Bacolod kay Atty. Jomax Ortiz, indi pa ini mabatyagan sa karun apang sa mga masunod nga sinemana ukon binulan mabatyagan na ang radical change sa economic policies sang administrasyon ni US President Donald Trump kasubong man sang Billionaire nga si Elon Musk.
Suno kay Ortiz ini man ang una nga bes nga grabe ang pagprotesta sang mga Americans bangud sa ginapatuman nga mga economic policies.
Dugang pa sini nga indi lamang sa hinali nga pagbag-o sa ekonomiya sang Estados Unidos ang ginaprotestahan sang mga pumuluyo bangud may yara man sang radical nga pagbag-o sa Health, Education kag iban pa.
Bangud sa mga ginahimo sang Trump administration ginalantaw sang abugado nga may yara sang impeachment nga matabo batok kay Donald Trump.
Samtang ginpahayag man ni Ortiz nga ang pagpatuman ni Trump sang tuman ka taas nga taripa sa mga produkto sang China padulong sa Estados Unidos amo nga sa tinutuyo nga pahuyangon ang ekonomiya sang nasambit nga pungsod agud nga maprotektahan ang Taiwan kasubong man ang West Philippine Sea sa Pilipinas.
