Ginkakibot sang abugado kag political analysts sa Bacolod City ang madasig nga pagpagwa sang Korte Suprema sang resolusyon kun sa diin gindeklarar nga unconstitutional ang Articles of Impeachment nga gin-file batok kay Vice President Sara Duterte bangud nag-violate ini sa one-year rule.
Sa interview sang Bombo Radyo Bacolod kay Atty Jomax Ortiz, madamo sang mga legal experts ilabi na ang yara sa University of the Philippines ang nakibot angot sa madasig nga pagdesisyon sang Supreme Court.
Suno kay Ortiz, ang 15 ka mga judges nga yara sa Korte Suprema ang unanimous nga nagdesisyon kag nagboto pabor sa pagdeklarar sang impeachment case nga gin-file sa bise presidente nga unconstitutional.
Suno diri, gintechnical sang husgado ang Kamara matapos nga wala nagsunod sa one-year rule sa pag-file sang impeachment case batok sa public official.
Apang wala man nagakahulugan nga abswelto ukon wala na sang sala sang Bise Presidente bangud sa desisyon kundi mahimo liwat nga mag-file sang impeachment case batok diri sa February 2026.
Suno sa political analyst ang anti-Duterte camp ang may yara sang plan B apang indi ang pagrefile sang impeachment case kundi amo pagfile sang plunder case batok sa bise presidente kag ini man ang rason kun ngaa tuyo ni Justice Secretary Jesus Crispin Remulla nga magbulos bilang Ombudsman bangud si Ombudsman Samuel Martires ang natalana nga magaretiro sa Agosto 2025.
Samtang, ang Senado nga naga-akto bilang impeachment court ang dapat magrespeto sa desisyon sang Korte Suprema, ang highest court of the land.
Suno pa sa abugado ang tanan nga nagakalatabo ang preparasyon na para sa 2028 Election.
Madumduman nga sang Disyembre 2024, tatlo ka impeachment complaints ang gin-file batok kay Duterte, kag ini ang naangot tanan sa alleged misuse sang confidential funds.
Apang ang ikaapat nga impeachment complaint ang gin-endorso sang masobra one-third sang mga lawmakers sa House of Representatives nga amo man ang gintransmit sa Senado sang February 5, 2025.
