Political Analyst, gintawag nga “premature announcement” ang pagdeklarar ni Vice President Sara Duterte nga magapapili bilang Presidente sa 2028

Ginpahayag sang Political Analyst nga tuman ka temprano ang pag-anunsyo ni Vice President Sara Duterte nga magapapili para sa 2028 presidential elections.

Suno kay Atty Jomax Ortiz, ang “premature annoucement” sang bise presidente ang una nga kahigayunan sa maragtas sang pulitika.

Pahayag sini nga kun ma-convict si VP Sara sa kaso nga gina-atubang sini antes pa ang 2028 elections, indi ini mahimo nga makapapili sa pagka-presidente.

Gani, paathag ni Ortiz nga ang game plan sang kampo ni Duterte amo ang pagpa-delay sa desisyon sang Korte Suprema antes pa man ang 2028 elections agud matigayon ini nga makapapili sa pwesto.

Nahibaluan nga ginpasaka ang ika-apat nga impeachment complaint batok sa bise presidente kahapon kun sa diin nagserbe nga complainant si Atty. Nathaniel Cabrera nga gin-endorso nanday House Deputy Speaker Paolo Ortega kag 6th District Manila Representative Benny Abante.