Gin-athag sang political analyst nga wala sang mahimo ang National Bureau of Investigation kun indi magsabat sa subpoena si Vice President Sara Duterte.
Sa interview sang Bombo Radyo Bacolod kay Atty. Jomax Ortiz, bangod wala sang complaint nga ginfile batok sa Bise Presidente sa NBI, sila ang wala sang mahimo bisan pa indi ini magpakita.
Nagapati si Ortiz nga nakahibalo na si VP Sara nga siya ang may deretso kun magatambong ukon indi bangod indi man korte ang NBI.
Paathag ni Ortiz nga depende sa ranking sang public officials, sila ang mahimo mapasakaan sang criminal case sa Sandigan Bayan kun sila ang may nakomiter nga dalagko nga krimen may kaangtanan sa ila trabaho.
Apang ginalantaw sini nga tuman ka nabaw sang grave coercion kag direct assault nga kaso.
Samtang conditional naman ang statement sini bangod ang gina-alegar pagpatay kanday President Ferdinand “Bongbong” Marcos Jr., First Lady Liza Araneta-Marcos kag House Speaker Martin Romualdez ang mahimo lamang kun siya ang una nga ipapatay.
Apang aminado si Ortiz nga indi maayo nga ang iya suspetso ang ginwaragwag sini sa publiko.
Sa pihak nga bahin ang kasumpong nga partido ang nagaplano man nga mapasakaan sang kaso nga plunder batok kay VP Sara angot sa anomalya sa budget spending sang Office of the Vice President.
Samtang may disbarment complaint man si Presidential Adviser for Poverty Alleviation Larry Gadon batok kay VP Sara sa korte suprema bangod sa mga nangin pahayag sang Bise Presidente.
Apang sa pagpati ni Ortiz, ang complaint sa defamation kag threats ang indi makasuporta sa impeachment complaint.
Ini bangod ang impeachable offenses ang ginalakipan sang high crimes kalakip ang treason, betrayal of public trust, bribery kag corruption.
Sa pihak nga bahin, kun magdangat gid man sa Ombudsman ang complaint, ginalantaw ni Ortiz nga dapat mag-inhibit si Ombudsman Samuel Martires kag ihatag sa iban ang kaso, bangod siya ang appointee ni former President Rodrigo Duterte.
