Nagalaom ang isa ka political analyst nga mahimuan sang mga ahensya sang gobyerno sang nagakaigo nga tikang ang pagtuhaw sang madamo nga fake account sa Facebook nga ginareklamo man sang mga estudyante kag iban pa nga Pilipino.
Sa interview sang Bombo Radyo Bacolod kay Atty. Rodel Taton, dean sang Graduate School of Law sang San Sebastian Recoletos Manila Graduate School of Law, ginpahayag sini nga nakibot man ini sang nagcheck ini kahapon sa Facebook nga may yara ini sang kapareho nga pangalan.
Suno diri, may yara sang salabton sa layi ang sin-o man nga tawo nga nagpangawat sang personal information kag paghimo sang kapareho nga account nga wala sang pahanugot sang tag-iya.
Suno kay Taton, kun ang lapnagon nga paghimo sang mga fake accounts ang isa ka glitch nga tuga sang Facebook, dapat lantawon ini gilayon sang management agud mahatagan sang tikang kag masolusyunan bangud nagahatag ini sang kahangawa sa publiko.
Ang nagakatabo sa karun suno sa dean ang nagapakita lamang nga madamo ang may yara sang concern sa privacy issues nga mahimo ngamiton sang mga nagatinunto sa social media platform.
Tion naman ini suno sa iya nga mangin mahinalungon sa pagbutang sang mga impormasyon sa account agud maprotektahan man ang kaugalingon.
Samtang nagpanawagan man ini nga sa tion nga may madiskubrehan nga may nagagamit sang personal details sang mga ini magluwas sa ila kag sa mga kakilala, nagakadapat lang nga ireport na ini gilayon agud mabuligan man ang mga biktima.
