Nagapati ang political analyst sa Bacolod City nga amat-amat na nga ginapapirmahan ang articles of impeachment batok kay Vice President Sara Duterte.
Sa interview sang Bombo Radyo Bacolod kay Atty Jomax Ortiz, antes ma-aprubahan ang articles of impeachment, kinahanglan sang one-third votes gikan sa miyembro sang House of Representatives.
Bangod 316 ang miyembro sang Kamara, kinahanglan nga makatipon sang 106 pasaka nga boto sang mga kongresista.
Nagapati si Ortiz nga nakahibalo na si VP Sara sa impeachment plot, kag mahimo ginahulat na lamang nga makompleto ang kinahanglan nga boto.
Kasunod sini, ipasaka ang articles of impeachment sa Senado.
Magakinahanglan naman sang two-third sang boto gikan sa 24 ka mga Senador ukon 16 ka boto sang mga Senador antes mapatuman ang impeachment.
Sa tion nga ma-impeach si VP Sara, mabakante ang pwesto sini kag magakinahanglan nga magnominate gikan sa House of Representatives ukon Senado.
Separado naman ang nomination sa lower kag upper House kag kinahanglan lamang nga makakuha sang mayorya nga boto.
Ginalantaw ni Ortiz nga mas kampante si VP Sara sa pag-atubang sa Senado kun ipaanggid sa Kamara bangod maathag na ang “tyranny of majority” sa House of Representatives.
Suno diri, maathag na nga mayorya sa mga kongresista ang yara sa kamot sang administrasyon, samtang madamo pa sang nagasuporta sa iya sa Senado.
