Ginalantaw sang political analyst nga indi makalab-ot sa siyam ka mga senador ang magasuporta kay Vice President Sara Duterte agud indi ini maimpeach.
Suno kay Atty. Jomax Ortiz, sadto pa man ginhambal na sini nga may ikaapat nga impeachment complaint kag ginalantaw nga ini na ang husto nga timing agud nga maimpeach ang bise presidente.
Una na sini ginpahayag nga ang timing ang tuman ka importante kag subong ang nakita nga husto nga tion agud nga maimpeach si Vice President Sara Duterte.
Suno kay Ortiz, ang ginpahayag sadto ni President Ferdinand “Bongbong” Marcos nga wala sini ginasuportahan ang impeachment batok sa bise presidente ang daw kaangay sang paghampang sang poker game nga baliskad ang nagakatabo kaangay man sadto sang nagpahayag si Former President Rodrigo Duterte nga indi magpadalagan bilang presidente.
Ginpahayag man sang abugado nga bisan kagab-i wala gintalakay ang impeachment sang bise presidente sa senado antes ang pag-adjourn sang mga ini, magapadayon sa gihapon ang impeachment hearing.
Ginalantaw nga kun madayon ang impeachment kag kun maconvict ang bise presidente, indi na ini makauyat sang public office.
Nagapati ang abogado nga indi magrisgo ang Presidente sa pagpadayun sang impeachment kun indi ini segurado nga makakuha sang 16 ka boto sa Senado.
Nagaduda man si Ortiz kun madepensahan sang amay nga Duterte ang bise presidente bangud bisan nakaagi ini fiscal, lain naman nga level sang pagdepensa ang sa impeachment trial kag ini ang nagakinahanglan sang eksperto.
Ginalantaw nga ang pagtindog sang anay presidente bilang abugado sang bise presidente sa impeachment trial ang pakitang gilas lamang.
Apang suno diri dapat indi pag-imock ang impeachment trial sa senado bangud indi ini kaangay sa kongreso.
Samtang sa tion nga maconvict ang bise presidente indi man maapply ang rule of succession bangud ang matabo amo nga ang presidente ang maganominate sang magapungko nga bise presidente kag igakumpirmar ini paagi sa majority votes gikan sa kongreso kag senado.
