Nagapati si political analyst Atty Jomax Ortiz nga posible nga naplanohan na nga ipaggwa si Shiela Guo sangsa ang utod sini nga si Alice Guo ang madakpan.
Kahapon, naaresto sa Indonesia sanday Cassandra Li Ong nga isa sa incorporator sang Philippine offshore gaming operator (POGO) hub Lucky South 99 kag Sheila Guo nga utod ni Alice Guo.
Sila ang na-intercept sang Indonesian authorities matapos magbyahe gikan sa Singapore sakay sa cruise ship kag kahapon sang hapon, natigayon nga mapabalik sa Pilipinas sanday Cassandra Li Ong kag Sheila Guo.
Suno kay Ortiz, tubtob sa karun wala sa gihapon nakit-an si Alice Guo kag ang isa pa gid sini ka utod nga si Wesley Guo.
Nagapati ang abogado nga naplanohan na nga ang utod nga si Sheila lamang ang ipaggwa imbes nga si Alice kag Wesley, bangod nga wala man sang direct participation si Sheila sa mga nagakatabo kag posible nga mahilway ini apang si Cassandra Li Ong naman ang gin-cite in contempt bangod nga wala ini nagpakita sa House panel hearings angot sa illegal nga pag-operate sang POGO.
Samtang, suno naman kay Bombo International News Correspondent Fraire Acupan, derekta sa Indonesia, nakit-an sanday Cassandra Li Ong kag Sheila Guo sa Mega Mall Batam Center sa Riau kag ang ini nga probinsya ang malapit lang sa Singapore.
Suno diri, mahimo na nga makapadulong sa Singapore paagi lamang sa bangka.
Pahayag sini, indi stritko ang immigration sa Indonesia kag bangod sa koordinasyon sang Indonesia sa Pilipinas natigayon nga maaresto ang duha.
