Nagapati ang political analyst nga may discrepancy sa mga pahayag sang driver ni anay DPWH Undersecretary Maria Catalina Cabral gani ini ang dapat nga maimbestigahan sang maayo.
Sa interview sang Bombo Radyo Bacolod kay Atty Jomax Ortiz, madamo ini sang kwestyon sa mga pahayag sang driver kaangay sa pagbilin sini ka Cabral sa Kennon Road sa Tuba, Benguet.
Suno diri, kun si Cabral ang nagmando sa iya driver nga siya ang ibilin bangod ini ang magapahangin lamang, bilang driver ini ang dapat nagpark lamang sa ulu-unhan kag magbantay kun san-o tawgon sang iya amo.
Apang ang driver ang nagbyahe pa sa tuman ka layo kag duha ka oras pa antes ginbalikan ang iya nga amo.
Dugang pa sini nga may history na nga sila ang ginpahalin sa area, gani kwestyonable kun ngaa nagbalik gihapon ang mga ini kag ginbiyaan pa si Cabral.
Suno kay Ortiz, sa nasambit nga kaso, tanan nga may access kag may motibo ang dapat ikonsiderar nga persons of interest.
Makaduluda man suno diri nga didto nagpabilin agud magpahangin si Cabral ilabi na nga tuman ka dulom sang area.
Para kay Ortiz, maalam mentally si Cabral bangod ini ang may tatlo ka masters degree, tatlo ka doctorate degree, may Harvard certificate, nangin Presidente sang Civil Engineer Society kag isa ka International Organization.
Para sa maalam nga tawo, nagapati si Ortiz nga indi ini maglumpat sa 30 meters nga pil-as bangod may posibilidad nga siya ang masab-it lamang sa mga kahoy kag indi mapatay.
Pahanumdom sini nga madamo sang paagi sa pag-utas ang kabuhi nga segurado sangsa ang maglumpat sa banglid.
Kumpormi naman ini sa madasig nga desisyon sang Department of the Interior and Local Government kag Office of the Ombudsman sa pagsecure sang mga ebidensya kalakip na ang mga electronic gadgets ni Cabral.
