Apisar nga mayuhay sanday Mayor Alfredo “Albee” Benitez kag Vice Mayor El Cid Familiaran makita sa campaign kick-off sang Team Asenso kag Team El Cid nga may-ara sang pagkontrahanay.
Sa interview sang Bombo Radyo Bacolod kay Political Analyst Atty Jomax Ortiz, bangod si Mayoralty candidate El Cid ang presiding officer sang Bacolod Citty Council, nakahibalo ini sang nagaka-aprubahan nga naggagwa kag nagasulod nga kwarta sa kaban sang ciudad.
Kahapon, kabahin sa ginkwestyon ni Familiaran ang P6 billion nga loans sa idalom sang Benitez Administration.
Ang nasambitan nga balor ang ginalantaw nga may dako nga epekto sa social services sang ciudad.
Apisar sini, ginpanginwala ni Congressional candidate Albee ang alegasyon kag ginpahayag nga P4 billion lamang ang loan.
Bilang abogado, para kay Ortiz, mas mapatihan ang pahayag ni Familiaran bangod siya ang mas nakahibalo kun pila ang mga balor sang gina-aprubahan nga mga programa ukon kontrata.
Suno diri, apisar nga si Congressman Greg Gasatay ang makasumpong ni Familiaran sa Mayoral position, si Albee ang iya gina-atake bangod ini ang makabig haligi sang Team Asenso.
Ginalantaw na ni Ortiz nga mahimo nga may napasaka na nga kaso angot sa tuman ka dako nga loans sang Benitez Administration.
Nagapati ang abogado nga nagloan sa dako si Mayor Albee sa tinutuyo nga mangin Super City ang Bacolod bangod nagakabiyaan na ang ciudad sang Iloilo City kag Cebu City.
Ang pag-utang kag ang kadtuan sang utang ang nagaserbe nga dako nga kwestyon ilabi na karun nga campaign period.
Suno kay Ortiz, si El Cid ang nagatindog nga man of masses ukon makamasa bangod ini ang makita sa mga kapehan kag naga-upod sa ordinaryo nga pumuluyo.
Samtang indi man manigar ang mga hinimuan ni Gasataya.
Nagapati si Ortiz nga mas magagarok pa ang masunod nga adlaw sang kampanyahanay.
