Nagapati ang political analyst nga suli sa sugid ni former President Rodrigo Duterte ang dapat nga patihan.
Ini kasunod sang pahanumdom sini sa iya bata nga si Vice President Sara Duterte nga magbiya na sa politika kag magfocus na lamang sa negosyo.
Sa interview sang Bombo Radyo Bacolod kay Atty. Jomax Ortiz, makapila na ka beses nga ang inisyal nga pahayag ni Duterte ang iya nga ginbawi kaangay sa pahayag sini sadto nga siya ang indi magpapili bangod wala sang kwarta.
Kasubong man ang pagsakay sini sa baruto padulong sa isa ka isla sa West Philippine Sea kag nagpahayag nga wala sang makatandog sa nasambitan nga isla, apang suli man ang natabo.
Gani nagapati ini nga ang pahayag nga indi magpapili si VP Sara, ang nagakahulugan nga ini ang magapadalagan sa 2028 Elections.
Dugang pa ni Ortiz nga yara na sa dugo sang Duterte ang politika kag indi ang mga ini magabuya.
Ini man ang rasun kun ngaa si former President Duterte ang liwat nga nagpapili nga alkalde sa Davao City kag nangin running mate Vice Mayor si Sebastian “Baste” Duterte.
Ginalantaw sang abogado nga duhaduha kun madaog ni Baste sa Mayoralty seat si Former Civil Service Commission (CSC) chair Karlo Alexie Nograles.
Suno kay Ortiz, sa pagdaog ni former President Digong, ini ang mahimo magbiya agud nga si Baste ang liwat nga makasaka bilang alkalde.
