Ginpahayag sang political analysts sa ciudad sang Bacolod nga mahimo may matabo nga coup d’etat sa senado kag islan si Senate President Francis “Chiz” Escudero.
Sa interview sang Bombo Radyo Bacolod kay Atty. Jomax Ortiz, ginpareho lamang sang Senate President ang pagpatigayon sang impeachment trial sa proseso sang pagpasar sang senate bill.
Suno kay Ortiz, ang pahayag ni Escudero ang wala nagasanto sa pahayag ni anay Senate President Koko Pimentel nga maathag sa sa Article 11 section sang 1987 Constitution nga nagapahayag nga dapat patigayunon ang impeachment trial gilayon kag wala sang delay apang si Escudero ang wala pa nagpatigayon sang trial sa Articles of Impeachment batok kay Vice President Sara Duterte.
Ginalantaw sang political analysts nga kakason si Escudero bilang presidente sang senado bangud ang luyag sini ang wala nagasanto sa luyag sang Malacañang.
Suno diri, luyag sang administrasyon sa karun nga mapadasig ang pagpatigayon sang impeachment trial kag madesisyunan na gilayon agud nga mapunggan nga makahimo sang momentum ang bahin sang mga Duterte.
Dugang pa sini nga kun sa bulan pa sang Hunyo patigayunon ang impeachment trial wala na sang oras gani dapat patigayunon na ini karun nga may oras pa.
Samtang kun indi pa madesisyunan ang impeachment antes ang 20th Congress, ini ang madulaan na sang pulos.
Ang pagfile sang petition nanday Atty. Israelito Torreon ang pangcounter naman sa tatlo ka impeachment case nga nauna nga nafile.
Suno diri, nagapanindugan si Torreon nga wala nahatagan sang husto nga tion ang bise presidente para magsabat sa tatlo ka impeachment complaint.
Suno pa diri, si Torreon ang nagapangita lang sang technicality nga kun mahimo pa lang mapauntat ang impeachment trial, ini ng untaton na lamang.
Paathag ni Ortiz, ang articles of impeachment ang makonsiderar nga wala sang pulos bangod ini ang mahimo materminate lamang kadungan sa pagtapos sang 19th congress kun sa diin dapat liwat nga magpasa sang bag-o nga articles of impeachment sa pagbukas sang 20th congress.
Apang, dapat man nga sundon ang one year bar rule kun sa diin wala sang duha ka impeachment complaint sa sulod sang isa ka tuig.
