Nagapati ang kilala nga political analyst nga matigayon subong nga tuig nga mapasar na nga mangin layi ang Anti-Political Dynasty Bill.
Kahapon, ginpangunahan ni Senator Risa Hontiveros ang public consultation para sa “Anti-Political Dynasty Bill” sa ciudad sang Bacolod.
Kalakip man sa panelist si Bacolod City Mayor Greg Gasataya kag political analyst Atty Jomax Ortiz.
Sa interview sang Bombo Radyo kay Ortiz, dako ang iya pagpati nga maaprubahan na ang hagna kag mangin layi ang Anti-Political Dynasty Bill.
Suno diri, kun madayon gid man ini kabahin sang graceful exit sang presidente kun matapos na ang iya termino kag sa kataposan makatulog ini nga may ginbilin ini nga legasiya.
Nahibaluan nga may apat na ka pending Anti-Political Dynasty Bill sa Senado nga ginalakipan sang Senate Bill No. 18 nga gin-author ni Senator Robin Padilla, Senate Bill No. 35 nanday Senator Ping Lacson kag Senator Erwin Tulfo, Senate Bill No. 285 ni Senator Kiko Pangilinan kag Senate Bill No. 1528 ni Senator Risa Hontiveros.
Samtang may 22 naman ka pending Anti-Political Dynasty Bill sa House of Representatives.
Pahayag sang abogado, importante nga madula na ang political dysnasty sa probinsya sang Negros Occidental agud may bag-o naman nga mga nawong nga makit-an nga nagapungko sa pwesto sangsa ang mga magpamilya lamang sa gihapon.
