Nagapati ang political analyst nga magadangat sa 10 ka tuig ang trial sa mga kaso ni expelled Negros Oriental 3rd Distruct Congressman Arnolfo “Arnie” Teves Jr.
Sa interview sang Bombo Radyo Bacolod kay Atty Jomax Ortiz, executive department sang Timor Leste ang nagpadakop kay Teves bangod ini ang makabig nga illegal alien matapos nga ginkanselar na sang Philippine government ang passport kag visa sini.
Wala naman sang pulos ang paghatag sang political assylum sang Timor Leste Court kag ang ginfile nga writ of habeas corpus.
Ginalantaw ni Ortiz nga ang pagdeport kay Teves ang resulta na sang paghinun-anon ni President Ferdinand “Bongbong” Marcos Jr. sa pinuno sang Timor Leste sa Asociation of Southeast Asian Nation (ASEAN) summit sa Malaysia.
Ini bangod dako ang pagnubo sa trust ratings ni Marcos matapos ang pagpaaresto kag pagpadala kay former President Rodrigo Duterte sa International Criminal Court sa Netherlands.
Ini ang nakita nga paagi ni Marcos kun paano sini mabawi-bawi ang nagpalay nga trust kag approval ratings.
Karun nga yara na sa Pilipinas si Teves, ang gindala na sa NBI Detention Facility sa New Bilibid Prison.
Nagapati si Ortiz nga mapatigayon na ang arraignment sa kaso sa Lunes ukon Martes, kag ang korte ang magatumod kun sa diin idetain si Teves.
Suno kay Ortiz, mahimo nga magtinir sa detention si Teves sa prisuhan sa sulod sang masobra 10 ka tuig samtang nagapadayun ang trial sa iya mga kaso.
Ini bangod magluwas sa multiple murder charges sa pagmassacre kay late Negros Oriental Governor Roel Degamo kag siyam ka iban pa, may tatlo pa ka separado nga murder cases nga ginatudlo man nga si Teves ang mastermind antes pa ang massacre sang Marso 4, 2023.
Pangabay ni Ortiz nga ang kaso ni Teves ang magserbe na nga eye opener sa mga nagahimo sang pagpatay kag indi lamang dapat sa Negros Oriental makita ang paghulag sang hustisya kasubong man sa Negros Occidental kag iban pa nga bahin sang pungsod.
Samtang, ginalantaw sang political analyst nga gamiton man sang administrasyon ang paagi sa pagpapauli kay expelled Negros Oriental 3rd Distruct Congressman Arnolfo “Arnie” Teves Jr. agud maaresto si Atty Harry Roque, ang presidential spokesperson sa idalom ni former President Rodrigo Duterte.
Sa interview sang Bombo Radyo Bacolod kay Atty Jomax Ortiz, apisar nga gingrant sang Timor Leste court ang political assylum kay Teves, siya ang napapauli gihapon bangod kanselado na ang iya passport kag visa.
Ini bangod nagapangatubang sang multiple murder charges si Teves, kag bangod siya ang ginakabig nga fugitive sa layi.
Suno kay Ortiz, si Roque ang may-ara naman sang warrant of arrest sa kaso nga qualified trafficking, may kaangtanan sa mga illegal POGO operations.
Sa karun, yara sa Netherlands si Roque kag naga-apply para sa political asylum.
Ini sa pagpati nga siya ang ginalagas sang administrasyon bangod kaalyado ini sang pamilya Duterte.
Bangod may kaso sa Pilipinas, ginkanselar naman ang iya passport kag visa.
Suno kay Ortiz, mahimo nga gamiton man sang Pilipinas nga rasun ang status ni Roque nga illegal alien sa Netherlands agud ini ang madeport pabalik sa Pilipinas.
