Nagapati si Atty. Jomax Ortiz nga sa tion nga dako ang impact indi lang sa lokal kundi bisan sa National pananglitan mapamatud-an sa election protest ni Bacolod City Mayor Evelio “Bing” Leonardia nga may posibilidad nga ma-preprogram ukon manipulahon ang mga vote counting machines (VCMs).
Suno sa abogado, isa sa balantayan kun ano ang matuod nga motibo sang alkalde sa pagfile sang election protest ilabi na nga nagdangat sa masobra 60 mil ang abanse sang nakuha nga boto sang iya kasumpong nga si Mayor-elect Albee Benitez.
Isa sa ginalantaw nga rasun ni Ortiz, amo nga luyag pamatud-an ni Leonardia nga sarang manipulahon kag mapreprogram ang mga VCM.
Paathag sang abogado nga nagakatingala ang Grupo Progreso bangod tuman ka dako ang nangin deperensya sang boto nga para sa ila misteryoso kag indi mapatihan.
Suno kay Ortiz kaangay man ini sa panawagan sang iban nga nagasuporta kay out going Vice President Leni Robredo bangod sa tuman man ka dako nga abanse diri ni Presumptive President Ferdinand “Bongbong” Marcos nga nagadangat sa masobra 16 ka milyon nga boto.
Panindugan sang abogado nga sa tion nga mapamatud-an ni Leonardia nga mahimo gid man manipulahon ang VCM, maga-ibwal man ang iban nga mga kandidato sa iban nga lokal nga pwesto pati na ang sa nasyonal.
Samtang isa man sa ginalantaw nga kabangdanan kun ngaa nagfile sang election protest si Leonardia bangod sa pride.
Suno kay Ortiz, dako nga insulto sa isa ka incumbent official nga mapierde sang masobra 60,000 votes.
Paathag sang abogado nga mapatihan pa ang kaangay nga deperensya kun indi incumbent ang napierde bangod yara sa nagapungko nga alkalde ang tanan nga political machineries and apparatus.
Sa karun, segurado na nga Benetiz ang entitled sa presumption of legitimacy.
