Ginalantaw sang political analyst nga ang pagbisita ni Vice President Sara Duterte kay former Vice President Leni Robredo, ang agud mabuligan nga masalbar ang iya pamilya.
Sa interview sang Bombo Radyo Bacolod kay Atty Jomax Ortiz, ulihi na lamang nga option sa pagbisita ni VP Sara ang para sa pagpangayo sang pasaylo, bangod ini ang sarang gid nga mahimo sa pagpungko pa lamang sa pwesto.
Madumduman nga ang sitwasyon sa karun ni VP Sara kaangay man sa eksperyensya ni former VP Leni sa idalum sang administrasyon ni former President Rodrigo Duterte.
Apang sadto si Leni ang wala ginhatagan sang cabinet position, sa baylo si VP Sara naman ang personal nga nagbiya bilang tiglikom sang Department of Education.
Ginalauman sang abogado nga sa tion nga madisolve ang House Quad Committee, may magafile sang impeachment batok kay VP Sara, bangod magaserbe nga grounds ang indi sini pagsabat kun paano gingastos ang P125 million nga confidential funds sang tinalikdan.
Nagapati si Ortiz nga sa nagakatabo sa karun, nagakalupog na ang mga Duterte, financially kasubong man sa popularity vote.
Bangod si Leni ang may-ara gihapon sang koneksyon sa Liberal Party, diri nagdangop sa VP Sara sa tinutuyo nga makapangayo sang bulig nga sila ang indi matam-an.
Ginalantaw sini nga may ginaluto na nga compromise deal sa tunga nanday VP Sara kag former VP Leni.
Apisar nagpahayag na si Leni nga magapapili bilang alkalde sa Naga City sa 2025 Midterm Elections, ini ang sarang gihapon nga makapapili sa Presidential Elections sa 2028.
Suno kay Ortiz, kun si House Speaker Martin Romualdez ang magapapili sa pagka-Presidente, ini ang wala sang padaog kay former VP Leni.
Samtang mahimo naman nga buy-an ni VP Sara ang pagpapili sa Presidential Election sa baylo nga mabuligan ang iya amay batok sa kaso sang International Criminal Court, nga ginpabaskog pa sa karun sang ginapatigayon nga House Quad Committee Hearing angot sa Extra Judicial Killings.
Dugang pa nga mahimo pasakaan sang kaso sang mga alleged rape victims ni Pastor Apollo Quiboloy si former President Duterte bangod sa pagprotekta sini sa pastor, nga mabug-at nga kaso.
Kasubong man kanday Paolo kag Baste Duterte nga mahimo man lagson bangod sa mga pagpanghangkat kay President Ferdinand ‘Bongbong’ Marcos nga magpanaog sa pwesto.
