Ginalantaw sang political analyst nga may mga plano na nga islan si President Ferdinand “Bongbong” Marcos Jr sa mga cabinet secretaries gani ini ang nagpanawagan sang courtesy resignation.
Sa interview sang Bombo Radyo Bacolod kay Atty Jomax Ortiz, may isa ukon duha na nga plano nga paluson si Presidente Marcos, apang agud wala sang komplikasyon tanan na lamang ang ginpapasa sang resignation.
Suno diri, may-ara sang insider sa mga miyembro sang gabinete kag sa ila mga secrete meetings partikular na sa tion sang kampanya, madasig nga nagalab-ot sa pihak nga partido ang ila nga mga plano.
Ini ang ginatawag man ni Ortiz nga cleaning up sang Marcos Administration.
Ginalantaw ni Ortiz nga paluson sang Presidente sa gabinete ang matumod nga naga-upod sa kontra partido.
Kalakip sa konsekwensya sang palpak nga kampanya amo ang pagkapulak nanday Manny Pacquiao kag outgoing Senator Francis Tolentino sa Senatorial race.
Aminado si Ortiz nga makakilibot ang desisyon sang Presidente bangod nakaligad lang nga adlaw ini nagpahayag nga luyag niya sang reconciliation sa pamilya Duterte.
Ini bangod magarantiya na nga ma-acquit sa impeachment case si Vice President Sara Duterte, kag kun indi mag-ayuhan ang ila relasyon, may matabo nga destabilisasyon sa ekonomiya bangod sa pagkadula sang pagsalig.
Apang hinali lamang ini nga nagdesisyon nga tinluan ang iya gabinete.
Suno diri, ire-appoint lamang ang mga kampi gihapon sa administrasyon, kag paluson ang natumod nga nagakampi sa kontra partido.
