Nagapati ang political analyst nga nadulaan na sang pagsalig ang pamilya Duterte kay Atty. Nicholas Kaufman bilang legal counsel ni anay Presidente sa International Criminal Court (ICC).
Ini kasunod sa pagbiya ni Kauffman bilang legal counsel ni former President Rodrigo Duterte sa ICC matapos ang isa katuig nga kontrata sang Marso 31, 2026 kun sa diin ginpahayag sini nga nakapili na ang anay presidente sang bag-o nga abogado nga maga-uyat sang depensa sa ginapangatubang nga kaso.
Sa interview sang Bombo Radyo kay Atty. Jomax Ortiz, ginpaathag sini nga si Kauffman ang nakaserbe man bilang abogado ni anay First lady Imelda Marcos gani nagapati ini nga kun lantawon indi conflict of interest ang rason sa pagbiya ni Kauffman kundi nadula na ang kumpyansa sang anay presidente kag ni Vice President Sara Duterte rason nga wala na gin-renew ang kontrata sini.
Ini bangud tanan nga motion ni Kauffman ang denied sa ICC lakip na ang hingyo sini nga indi pagtambong ni Duterte sa trial kag request sa temporary nga paghilway sini.
Suno diri, wala pa ang bisan isa nga motion sang legal team ni Duterte nga ginpaboran sang ICC.
Gani suno kay Ortiz, ginlanataw sang pamilya Duterte nga kun i-renew nila ang kontrata sini kalabanan ma-convict ang anay Presidente.
