Ginalantaw sang political analysts sa ciudad sang Bacolod nga nagalikaw sa pamangkot si Vice President Sara Duterte gani nakasabat ini nga ginapulitika ang national budget.
Kahapon, sa senate hearing, gin-usisa ni Senator Risa Hontiveros ang libro nga ginpanagtag sang bise presidente nga siya mismo ang author.
Bangud sini nag-ibwal man ang bise presidente kag gintawag nga ginapolitika ang national budget.
Sa interview sang Bombo Radyo Bacolod kay Atty. Jomax Ortiz, simple lang man kuntani ang pamangkot kag mahimo nga sabton sang simple apang bangud nagalikaw ang bise presidente sa pamangkot ni Senator Hontiveros, lain ang tono sang pagsabat sini.
Suno kay Ortiz, luyag lamang nga mahibaluan sang senadora sa senate hearing kun para sa diin ang libro kag sin-o ang mga ginhatagan sini.
Suno diri, isa pa sa luyag mahibaluan ang rasun kun ngaa gastuhan sang gobyerno sang P10 million ang nasambit nga libro nga mismo gin-author sang bise presidente.
Dugang pa sang political analysts nga wala kuntani mamalisyahan ang libro kun lain lamang ang author.
Pahayag pa ni Ortiz, bisan ano pa ka alam ang isa ka tawo kun nagalikaw sa pagsabat sang simple nga pamangkot, lain ang masabat sini.
