Ginalantaw sang political analyst nga ang nagapanguna nga rasun sa foreign travels ni President Ferdinand “Bongbong” Marcos Jr. amo ang maka-angkon sang alyansa para sa pagpakigbato sa West Philippine Sea kag ikaduha na lamang ang pagpangita sang foreign investors.
Sa interview sang Bombo Radyo Bacolod kay Atty Jomax Ortiz, ang China nga isa sa apat ka nabilin nga Communist Country, ang hinali nga nangin super power matapos ginhakos ang mga panibag-o nga teknolohiya.
Suno diri, pila ka ciudad sa China ang nagaserbe nga kapitalista, kag sa pagpasulod sang mga manufacturing firms kun sa diin ang mga Chinese ang manpower, mahapos lamang sa pungsod nga masunod ang teknolohiya nga gamit sang iban nga pungsod.
Dugang pa sang abogado nga sa populasyon nga 1.425 billion, kag mataas nga teknolohiya, ang China ang nangin super power.
Suno kay Ortiz, kun maagaw pagid sang China ang West Philippine Sea, nga strategic location nga bugana sa resources kag trade route sang madamo nga kapungsuran, mahimo nga mangin pangaduha na lamang nga super power ang Estados Unidos nga may-ara lamang sang populasyon nga P339 million.
Pahanumdom sang abogado nga nakasulod ang China sa West Philippine Sea sumugod sang ginpahanugutan ni former President Rodrigo Duterte.
Pahayag ni Ortiz nga sadto wala man nagatapak ang China sa West Philippine Sea, apang sa karun sila ang nagasulod nagid kag gina-angkon ang Exclusive Economic Zone (EEZ) sang Pilipinas.
Nagapati ang abogado nga si Presidente Marcos ang nagapanalo na lamang sa ginbilin nga problema sang nakaligad nga administrasyon.
Sa pihak nga bahin, ginpahanumdom ni Ortiz nga sa maragtas, sa tion sang mga giyera, ang Australia ang masami una pa nga nagapadala sang pwersa sangsa Estados Unidos.
Ang alyansa sang Pilipinas sa Australia, Estados Unidos kag North Atlantic Treaty Organization (NATO) ang ginpatigayon agud ma-intimidate ang China sa paghimo sang tikang.
Aminado si Ortiz nga wala mahimo ang pungsod kun makigyera sa China, gani sila ang nagasalig sa democtratic nga pamaagi sa pagresolbar sang sitwasyon.
