Ginpahayag sang political analyst nga maximum tolerance sa karun ang polisa nga ginapatuman sang Philippine government may kaangtanan sa issue sa West Philippine Sea.
Sa interview sang Bombo Radyo Bacolod kay Atty. Jomax Ortiz, indi pa matawag nga armed attack ang ginhimo sang China nga pagpangharras sang Lunes apisar nga nga may Philippine Navy personnel nga nautdan sang tudlo.
Bangod indi makabig nga armed attack, indi man matrigger ang defense treaty sa Estados Unidos.
Aminado si Ortiz nga sa makapila na nga pagfile sang diplomatic protest sang Pilipinas, ini ang makabig na lamang nga execise of futility ukon wala sang pulos, bangod bisan ang pagdaog sang Pilipinas sa 2016 Arbitral Ruling sa International Court ang wala ginakilala sang China.
Ang nagakatabo bisan sa pagpatigayon sang resupply mission, ang Pilipinas pa amo ang naga-adjust sa kahangawa nga makatrigger sang 3rd World War ukon bisan Regional war lamang.
Apang sa karun, nagatingog naman ang iban nga may overlapping claims sa kadagatan kaangay sang Vietnam, Taiwan, Malaysia kag iban pa.
Sa pihak sini, ginpasalig ni Ortiz nga indi dapat magkahangawa ang Pilipinas sa posibilidad nga indi magbulig ang Estados Unidos kaangay sa natabo sa Ukrain.
Ini bangod ang Ukraine ang wala sang defense treaty sa Estados Unidos indi kaangay sa Pilipinas.
Sa pihak sini, nagahalong lamang si President Ferdinand ‘Bongbong’ Marcos Jr. sa iya ipaggwa nga statement bangod aminado ini nga madamo sang nagabantay nga mga pungsod.
Suno kay Ortiz, dapat batunon na gid lamang nga manubo na katama ang panulok sang iban nga pungsod sa Pilipinas bangod sa nagakatabo, apang sa karun kita ang wala sang mahimo.
Ginapangabay na lamang sang abogado nga marealisar sang pamunuan sang China nga naganubo man ang panulok sang iban nga pungsod, bangod sa ila mga tikang nga nagapakita sang ila pagka-komunista.
Apang nagapati si Ortiz nga ang West Philippine Sea lang gid ang lagas sang China kag wala sang tuyo nga sakupon ang Pilipinas.
