Nagakadapat nga respetuhon sang tagsa ka kandidato bilang presidente ang plata porma ang kada isa suno sa political analyst sa syudad sang Bacolod.
Sa interview sang Bombo Radyo Bacolod kay Atty. Jomax Ortiz, ginpahayag sini nga kun lantawon nga palareho lang man ang plata porma sang mga kandidato santo sa ila ginplastar sa presidential candidate forum kahapon kag ini ang may tinutuyo sa matinlo nga panggobyerno.
Suno kay Ortiz si Presidential aspirant Panfilo Lacson ang nakaagi na nagpadalagan bilang presidente sang 2004 apang wala ini magdaug apang sa karun mahimo ini nga mangin mapalaron.
Ginpahayag man sini nga may rason kun ngaa wala nagtambong sa KBP Panata sa Bayan presidential candidate forum si Presidential Aspirant Ferdinand “Bong bong” Marcos bangud ,ahimo nga nakahibalo ini nga ipamangkot ang mga negatibo nga mga bagay kaangay sang ill gotten wealth sang mga Marcos.
Samtang gindayaw man sini si senator Manny Pacquiao nga dako na ang pagbag-o sini santo man sang plastar niya sang iya sabat sa presidential forum.
Ginpahayag man sini nga maayo man magsabat si Ka Leody De Guzman.
Ginalantaw man ni Ortiz nga maayo man nga na interview ang mga kandidato agud nga mahibaluan man ang mga plano sa tion nga sila ang mangin mapalaron sa tion sang election.
Apang gin-athag sini nga indi dapat pagsaligan ang mga ginahambal sang mga kandidato sa tion sang pagkampanya samtang nagapadalagan ang mga ini bangud lunsay promisa lamang ini kag mahimo nga indi matuman.
Nagpanugyan man ini sa mga pumuluyo nga kinahanglan nga ipractice sang mga ini ang kinamatarong nga magboto ukon right to suffrage.
