Maayo nga balita para sa political analyst nga may-ara sang nadisqualify ang Commission on Election may kaangtanan sa vote buying, agud magserbe nga leksyon sa iban.
Ini kasunod sang pagdagdag sang disqualification order sang COMELEC batok kanday Barangay Marcelo Punong Barangay Arnulfo Libodlibod kag mga barangay kagawad nga sanday Eddy Monterde, Joel Rosello, Prescila Patajo, Richard Diotay kag Elmor Marcelo sa banwa sang Calatrava.
Wala naman nagdaug sa eleksyon ang duha ka iban pa nga respondents nga sanday Jeremias Diotay kag Hernani Cabugwas.
Ang nagfile sang complaint amo si Maximo Rezaga Jr., ang wala nagdaog nga nagpadalagan bilang punong barangay.
Ang reklamo ang ginfile sini sa Comelec sa Manila sadtong September 27, 2023.
Nag-ugat ini sa mga kaso angut sa baklanay sang boto sa Barangay Marcelo kun sa diin nagpanghatag sang 25 kilograms sang bugas kag P1,500 nga cash ang nasambit nga mga barangay officials sa 20 ka mga pamilya nga naapektuhan sang sunog sa Barangay Marcelo Public Market sadtong Septyembre 23, 2023.
Suno kay Ortiz, dapat gilayon nga mag-apelar ang mga opisyal sa korte suprema antes pa mangin final ang desisyon.
Apang pahayag sang abogado nga madugay na ang layi batok sa vote buying apang karun lamang may naconvict.
Aminado ini nga tuman na kalala sang baklanay sang boto sa karun, bangod ang sadto tig-P200 lamang sa karun may iban nga nagadangat na sa P2,000 ang pamakal.
Sa pihak sini ginapaathag sang abogado nga sa vote buying, parehas nga guilty ang nagbakal kag nagbaligya sang boto.
Apisar pa nga ihambal sang nagbaligya sang boto nga nagbatun lamang ini sang kwarta apang lain ang ginboto, ini ang makabig gihapon nga vote buying.
Bisan ang paghatag sang bugas ang makabig man nga vote buying, bangod ang paghimo sini kadungan sang campaign period ang maka-impluwensya sa desisyon sang mga botante.
