Nagapati ang political analyst nga natural lamang ang ginhimo ni President Ferdinand “Bongbong” Marcos Jr. nga pagpalos sang Bise Presidente kag former Presidents sa National Security Council.
Sa interview sang Bombo Radyo Bacolod kay Atty Jomax Ortiz, tuman ka sensitibo sang mga impormasyon sa National Security Council bangod seguridad sang pungsod ang ginatalakay diri.
Suno sa abogado, naglapaw na sa demarcation line ang nangin statement ni Vice President Sara Duterte nga hinali may magpatay sa iya, siya ang may ginsugo naman nga magpatay kay Presidente Marcos, First Lady Liza Araneta-Marcos kag House Speaker Martin Romualdez.
Bangod irreconcilable na ang relasyon sang Duterte kag Marcos, natural lamang nga magpangaman ang Presidente bangod hinali sila ang magbuya sang sensitibo nga impormasyon sa NSC, ini ang mahimo gamiton nga oportunidad sang kontra partido.
Kasubong man si former President Gloria Macapagal Arroyo, nga una na nga naghatag sang statement sa Quad Committee Hearing nga nagpamatuod sang iya political color, nga nagasuporta sa mga Duterte.
Dugang pa ni Ortiz, nga kun yara sa NSC ang mga kontra ni Presidente Marcos, ang mga ini ang magapugong-pugong sa paghatag sang mga impormasyon nga para sa national security bangod madamo sang ginakahangaw-an.
Indi kompormi si Ortiz sa mga pahayag sang iban nga political analyst kag abogado nga layi lamang ang makapalos sa pagpungko sang Bise Presidente kag former Presidents sa NSC.
Ini bangod yara sa gahom sang Presidente ang pagdesisyon kun sin-o ang ibutang sa ahensya, kaangay sadto kay Vice President Leni Robredo nga wala gid ginhatagan sang Cabinet position.
Bisan maglakat sa abroad ang Presidente, wala man nagakahulugan nga Bise Presidente na ang magapungko nga acting presidente, sa baylo si Marcos ang mahimo makapili sang iban nga temporaryo nga magtal-os sa pwesto.
