Para kay political analyst Atty Jomax Ortiz, masadya kag mabakod ang pulitika sa ciudad sang Bacolod para sa 2025 Midterm elections.
Kahapon, gin-anunsyar ni anay Bacolod City Mayor Evelio “Bing” Leonardia nga magapapili ini bilang Congressman sang Lone District sa ciudad kag pagkasunod sini gin-anunsyar naman ni Barangay Singcang Airport Punong Barangay Atty. Caesar Distrito, spokesperson ni Bacolod City Mayor Alfredo “Albee” Benitez nga 90 percent inclined nga magapapili si Albee bilang congressman.
Sa interview sang Bombo Radyo sa abogado, kun sadto nagbunggo-anay sanday Bing kag Albee sa pagpapili bilang alkalde, sa karun posible naman nga maliwat ang engkwentrohanay sang duha para sa pagkakongresista.
Nagapati man ini nga preparado si Bing sa pag-atubang sini kay Albee.
Suno kay Ortiz, wala sang may nakahibalo kun ano ang plano ni Albee kun ngaa magapapili ini bilang kongresista samtang may mga plano kag proyekto pa ini bilang alkalde nga wala pa natapos.
Samtang, ginalantaw man nga posible mapapili si Bacolod City Lone District Congressman Greg Gasataya bilang alkalde sa ciudad kag maatubang sini amo si Bacolod City Vice Mayor Elcid Familiaran nga suportado ni 3rd District Caretaker Congressman Joseph Stephen Paduano para sa mas mataas nga posisyon.
Suno kay Ortiz, sa Oktubre 8, katapusan nga adlaw sang filing sang Certificate of Candidacy tanan mahibaluan kun ano man ang opisyal nga posisyon sang mga kandidato, samtang sa karun posible pa nga magkambyo ang mga desisyon nga ginpagwa sang mga ini.
