Wala na sang mahimo ang court order nga nagagrant sang political assylum kay expelled Negros Oriental Congressman Arnolfo “Arnie” Teves kun siya ang yara na sa Pilipinas.
Si Teves ang ginsakay na sa eroplano sang Philippine Air Force sini nga hapon pabalik sa Pilipinas.
Sa interview sang Bombo Radyo Bacolod kay Political Analyst Atty Jomax Ortiz, normal lamang ang pagpadala sang Philippine contingent sa pagfacilitate sang transfer kag indi nga isalig lamang ini sa Timor Leste government.
Suno diri, sa pag-abot sa Pilipinas, deretso na sa prisuhan si Teves bangod non-bailable ang multiple murder charges nga ginfile batok sa iya.
Dugang pa sini nga ang writ of habeas corpus nga ginfile ni Atty Ferdinand Topacio, legal counsel ni Teves, ang wala naman sang gahom bangod ini ang nagakwestyon lamang sa pag-aresto sa iya sang Timor Leste authorities nga wala sang warrant of arrest.
Apang pahanumdom ni Ortiz nga kanselado na ang visa ni Teves, nga nagakahulugan nga illegal ang pagtinir sini sa pungsod.
Suno sa abogado ang immigration officer ang sarang maka-aresto sa mga illegal aliens bisan wala sang warrant agud sila ang mapalayas sa pungsod, nga amo ang ginapahayag nag-aresto kay Teves.
Nagapati ini nga ini na lamang ang paagi ni President Ferdinand “Bongbong” Marcos agud mabalik ang nagapalay na nga pagsalig sang mga Pilipino.
Suno kay Ortiz, madamo sang akig sa Marcos Administration matapos ang pag-aresto kag pagpadala kay former President Rodrigo Duterte sa International Criminal Court sa The Hague, Netherlands.
Ang pag-aresto kay Teves, ang nakita nga pamaagi agud mapasalig ni Marcos sa mga tawo nga nagatrabaho pa ang justice system sa pungsod.
Ini bangod sa pag-aresto kay Pastor Apollo Quiboloy, kag kay former President Duterte, kag paglagas sa karun kay former Presidential Spokesperson Harry Roque, madamo ang nagalantaw nga ginalagas lamang sang Marcos Administration ang mga alyado sang Duterte, apang wala ginasapak ang iban nga may bayolasyon sa layi.
Dugang pa ni Ortiz, nga may pending cases si Teves sa Pilipinas gani ini ang dapat nga papulion.
Ini man ang mahimo nga wala na-antisipar sadto sang kampo sang Duterte, bangod suno kay Ortiz, kun may nagfile bisan gamay lamang nga kaso batok kay Duterte sa korte sa Pilipinas, mahimo nga ini ang wala pa madala sa ICC.
Ini bangod kun may kaso sa pungsod, ang ICC ang magapangayo pa sang consent sa local court antes makuha ang akusado.
