Ginpahayag sang political analyst nga ang politika sa Estados Unidos ang may ara gid sang impluwensya sa politika sang Pilipinas.
Sa interview sang Bombo Radyo Bacolod kay Atty. Jomax Ortiz, may impluwensya gid ang pungsod Amerika sa Pilipinas bangud man sa colonization sini sa Pilipinas sang 1901 tubtob nga nakaangkon sang independence sang July 1946.
Suno kay Ortiz, bisan ang form sang gobyerno sang Pilipinas ang napatern sa pungsod America kasubong man ang Economic Policy sang pungsod.
Suno diri bisan pa nga ginkakas na ang mga base militar sini sa Pilipinas, magapabilin sa gihapon ang impluwensya sini sa pungsod.
Dugang pa sini, sa iya paglantaw sa mainit nga issue sa West Philippine Sea, indi magpasugot ang Estados Unidos nga makaplastar ang China didto bangud magapabilin sa gihapon ang interes sang America.
Ini man ang rason nga nagpabutang ang mga ini sang Enhanced Defense Cooperation Agreement (EDCA) sites.
Suno diri ang Pilipinas kag Taiwan ang strategic para sa commerce purposes gani indi magpasugot ang America nga ini ang maplastaran kag makuha sang China.
Samtang, ginpahayag man ni Ortiz nga ang America ang interesado man kun sin-o ang mangin presidente sang Pilipinas bangud bisan dictador ang isa panggobyerno kun nakita sang Estados Unidos nga ginatindugan ang interes sang mga ini, ang pungsod ang proteksyunan sang America.
Tion nalang ang makahibalo kun paano maka-impluwensya ang politika sang America sa Pilipinas.
Ginpahayag man nga may yara na sang mga indibidwal nga nagapanilag sa dalagan sang pamulitika sa Pilipinas kaangay lamang sa nagahilapit nga 2025 midterm elections kun sa diin preparasyon sa 2028 presidential elections.
