VATICAN CITY – Ginpahayag ni Pope Francis kahapon nga ang risgo sa global conflict dala sang invasion sang Russia sa Ukraine ang dapat nga magkumbinser na sa tanan nga nag-abot na ang tion agud nga isikway sang mga katawhan ang gyera antes paman i-abolish sang gyera ang katawhan.
Sa atubang sang linibo nga mga tawo sa St. Peter’s Square, ginpahayag sang Santo Papa nga masobra isa ka bulan na ang nakaligad sang nag-umpisa ang invasion sa Ukraine ukon sa pag-umpisa sang mapintas kag wala sang kapuslanan nga gyera nga kaangay sa tanan nga gyera, tanan ang piyerde.
Pahayag sini nga dapat isikway ang gyera, ang lugar sang kamatayon, ang lugar kun sa diin ginalubong sang mga amay kag iloy ang ila nga mga kabataan, ang lugar kun sa diin ginapatay sang mga tawo ang tagsa nila ka mga utod, ang lugar kun sa diin ang makagagahom ang nagadesider kag ang imol ang nagakapatay.
Pahayag ni Pope Francis nga ang gyera sa Ukraine ang padayun nga nagaguba sa bwas damlag sang pungsod, kun sa diin tunga sa mga kabataan sang pungsod ang nagpalagyo na gikan diri.
Ini naman ang nagapakita sang kapintas sang gyera nga kaangay sang sapat, barbarous kag sacrilegious, gani ginahingyo sini sa iya nga mga tagpalamati nga indi pag-ikonsiderar nga ang gyera ang indi malikawan ukon dapat kaanaran.
Pahayag sini nga kun mag-entra sa gyera, tanan gihapon ang makabig nga guilty kag magapangatubang sa risgo sang self-destruction gani ang mga tawo ang dapat nga makahangop nga nag-abot na ang tion agud tapuson ukon untaton na ang gyera sa maragtas sang tawo antes pa nga ubuson sang gyera ang tawo sa maragtas.
