Ginpangamuyuan ni Pope Francis ang mga biktima sang makamamatay nga pagpangbomba sa nagpatay sa indi magnubo apat ka mga persona kag nagpilas sa masobra 50 ka mga indibidwal sa isa ka misa sa Mindanao State University sa Marawi City sang Domingo.
Ginpahayag sang Santo Papa nga iya ginlakip ang mga biktima sang pagpangbomba sa iya pangamuyo.
Suno diri, malapit ini sa mga pamilya kag mga pumuluyo sang Mindanao.
Ang explosion ang natabo sa Dimporo Gymnasium sang Mindanao State University nga gintambungan sang mga estudyante kag faculity alas 7:30 sang aga, Disyembre 3.
Ginlaragway ni Philippine Army 1st Infantry Division commander Major General Gabriel Viray III ang pagpang-atake bilang isa ka “terror act.”
Suno sa iya, gin-implementar ang heightened alert matapos ang insidente.
Suno kay Bangsamoro Police Regional Office regional director Police Brigadier General Allan Nobleza, ginalantaw sang mga otoridad ang posible nga koneksyon sa tunga sang kamatayon sang 11 ka mga miyembro sang Dawlah Islamiyah militant group sa isa ka firefight batok sa katapo sang militar.
