Nagpanugyan ang Department of Agriculture (DA) sa publiko nga maghalong sa pagbakal sang imported nga puti nga sibuyas bangud sa posibilidad nga ini kontaminado sang salmonella kag heavy metals.
Suno kay Agriculture Secretary Francisco Tiu Laurel Jr., may peligro nga dala ang ini nga mga imported nga produkto ang makahalit nga bacteria matapos natukiban nga may mga sibuyas nga nagpositibo sa salmonella sa Pampanga.
Base sa imbestigasyon sang mga otoridad, may 34 ka metric tons sang puti nga sibuyas halin China ang ilegal nga napasulod sa pungsod. Ang mga ini ang ginsulod paagi sa Subic Port kag gin-consign sa Manila-based nga kompaniya nga Leksei B. Specialized Goods Trading.
Padayon pa subong ang imbestigasyon sang mga ahensya sang gobyerno agud matukiban ang kabug-usan nga impormasyon kag matapna ang paglapta sang delikado nga produkto sa merkado.
