Masobra P6 billion ang kinahanglanon nga pondo agud nga mahatagan sang P2,000 nga ayuda ang tanan nga mga pumuluyo sa ciudad sang Bacolod kag probinsya sang Negros Occidental sa idalom sang Bayanihan to Arise as One Act ukon Bayanihan 3.
Nahibaluan nga sa idalom sang hagna nga ginaduso sa Kamara, bisan lapsag ang nalakip sa isip sa mga makabaton, basta narehistro ini sa Office of the Civil Registrar.
Pananglitan mapasar bilang layi, ang una nga tranche nga P1,000 ang igahatag isa ka bulan halin sa effectivity sang layi, samtang ang second tranche ang igahatag makaligad ang tatlo ka bulan.
Sa interview sang Bombo Radyo Bacolod kay Luis Gonzales, chief statistical specialist sang PSA-Negros Occidental, 2, 497,251 ang populasyon sang probinsya sang Negros Occidental, santo sa census sang Agusto 2015.
Bangud sini, nagakinahanglan sang P4.994 billion nga pondo agud nga mahatagan sang P2,000 ang tanan nga pumuluyo sa probinsya.
Ang populasyon naman sang ciudad sang Bacolod ang nagadangat sa 561,875.
Ini ang katumbas sang P1.123 billion nga pondo para sa ayuda.
Sa kabug-usan, P6.118 billion nga budget nagikan sa national government ang kinahanglan agud nga mahatagan ang P2,000 financial assistance ang tanan nga Bacolodnon kag Negrense.
Wala pa diri malakip ang nagdugang sa populasyon halin sang Setyembre tuig 2015 tubtub sa karon.
Suno kay Gonzales, nakapatigayon na sang bag-o nga census sang tuig 2020 apang ginahulat pa nga pirmahan sang presidente ang data bangud ang Office of the President ang magadeklarar sang opisyal nga populasyon sang Pilipinas.
Suno kay Gonzales, may yara sang birth rate kada bulan sa kada local government unit (LGU).
Aminado man ini nga nagdamo man ang populasyon sang probinsya.
Kun maaprubahan ang layi, magadihon sang implementing rules and regulations kag igapatuman ini sang Department of Social Welfare and Development bilang implementing agency.
Magapakig-angot naman ang DSWD sa local government unit nga magabulig sa paghatag sang kinahanglanon nga data kag pagrelease sang ayuda.
