Nag-awas na ang tubig sa Mandalagan creek kag Banago creek nga nagtuga sang pagbaha sa dalan sang Barangay Banago.
Humalin pa kagab-i ang pagbaha sa barangay apang alas 9:30 kaina sang aga, tubtob sa tuhod sa ang baha sa dalan.
Iban nga motorsiklo nga nagalabay nagaka-aberya kag nagakapatyan sang makina.
Sa interview sang Bombo Radyo kay Nano Garcia, bangod sa baha indi sini mahimo nga magbyahe sang iya tricycle kag wala naman ini sang iban pa nga palangitan-an.
Suno diri, alas 2:00 kaina sang kaagahon nagsaka na ang tubig kag ginsulod ang ila balay gani nagdesisyon ini nga mag-evacuate.
Ginpakamaayo na lang sini nga ipangtong-tong ang ila mga gamit agud indi mabasa.
Dala sini ang iya apat ka kabataan, asawa kag pamilya nga kaupod sa isa ka compound sa Domingo Lacson National High School nga ginhimo nga evacuation center sang barangay.
Madamo naman sang evacuees sa evacuation center kag sila ang ginhatagan naman sang food packs.
Samtang, nagpasalamat na lang ini nga baha lang kag wala sang mabaskog nga hangin nga mas delikado pa gid.
Halos kabilogan naman sang barangay Banago ang ginbaha sa pag-awas sang tubig sa Banago creek.
