Tatlo na ang nagfile sang Certificate of Candidacy sa pagka-kongresista sa ciudad sang Bacolod samtang wala pa sang may nagfile sa pagka-alkalde.
Madumduman nga sang Oktobre 1 nagfile si anay Bacolod City Mayor Evelio “Bing” Leonardia para magpapili bilang congressman sang Lone District sang Bacolod City kag pagkasunod nga adlaw, Oktobre 2 nagfile naman sang COC si Romy Gustilo para sa amo man nga posisyon.
Kaina sang aga, nagfile man sang COC si Eduardo Gulmatico para sa pagka-kongresista.
Samtang, nagfile naman sa pagkakonsehal amo sanday Christian John Weber sang Barangay Mandalagan; Barangay Vista Alegre Punong Barangay Jose Maria Leandro Norberto ‘Lindy’ de Leon; Brgy Pahanocoy Punong Brgy Yolanda Noble; Brgy Kagawad Ernesto Yap sangh Brgy 32; Ken Paolo Gilo; Kenneth Ian Belario; Pete Pico former DIWA Partylist Representative kag Lilian Sembrano, presidente sang Kabakod Negros Transport Coalition Incorporated (KNETCO).
Suno kay Bacolod City Election Officer Atty. Revo Sorbito, wala sa gihapon sang may nagfile sang COC para sa pagka-alkalde sa ciudad sang Bacolod.
Suno diri, duha ka grupo ang ginalauman nga magapadulong bwas nga adlaw para magfile sang COC amo nga plano nga limitahan ang makasaka sa Liga ng mga Barangay Office.
