Nagdangat na sa lima ang baboy nga nagpositibo sa African Swine Fever (ASF) sa ciudad sang Bacolod.
Ini matapos nga nagpositibo ang isa ka baboy sa ginpatigayon nga random sampling sang City Veterinary Office (CVO) sa slaughterhouse.
Sa interview sang Bombo Radyo Bacolod kay Assistant City Veterinarian Dr. Janine Sarthou, nga padayon pa nga gina-backtrack sang ciudad kun diin nga Barangay naghalin ang ilihawon nga baboy nga nagpositibo sa nasambit nga virus.
Suno kay Sarthou, ang lima ang ginalakipan sang tag duha ka baboy nagikan sa Barangay Alijis kag Taculing samtang ang isa ang nadiskubrehan sa slaughter house na.
Nag-negative naman ang tanan nga baboy nga ginasagod sa palibot sang 500 meter radius sa Barangay Alijis kag Taculing.
Nagapanawagan man ang Bacolod City Veterinary Office sang kooperasyon sang mga nagasagod sang baboy sa tanan nga mga tikang nga ginahimo sang mga ini agud malikawan ang paglapta sang virus.
Suno sa City Veterinarian, wala sang dapat nga kabalak-an ang mga ini bangud ginasiguro nila nga ginasunog ang ila PPEs sa ila ginahalinan nga tangkal agud mag-test antes magpadulong pa sa isa pa ka babuyan.
Sila ang naga-disinfect man gilayon para masiguro nga indi sila carrier sang virus.
Sa karon, wala pa sang ginapatuman nga border control sa Bacolod.
