Igasumiter na sang mga transport groups sa Martes ang position paper nga magahingyo kay Department of Energy Secretary Alfonso Cusi nga isuspend ang pagpatuman sang excise tax sa produktong petrolyo kag ang 12 percent value added tax.
Kahapon, nag-abiso ang DOE nga handaan naman sang mga motorista ang saka sa presyo sang produktong petrolyo sa Martes sang aga.
Sa interview sang Bombo Radyo kay Diego Malacad, secretary-general sang United Negros Drivers and Operators Center, magahingyo sila sang P2.50 nga saka sa pamasahe kun indi pagpaboran ang ila hingyo nga isuspend ang excise tax sa idalom sang TRAIN Law.
Suno kay Malacad, P10.40 na ang ginsaka sang presyo sang krudo subong nga tuig.
Bangud sini, hingyuon nila sa Land Transportation Franchising and Regulatory Board nga dugangan sang P2.50 ang P10.00 nga pletehan subong agud nga madugangan man ang P300 tubtub P400 nga takehome income.
Aminado naman si Malacad nga magalabay pa ini sa public consultation antes aprubahan sang ahensya
Naintindhan naman sang chairman sang committee on transportation sa Sangguniang Panlungsod sang Bacolod ang ginahingyo sang transport groups.
Suno kay City Councilor Dindo Ramos, apektado ang income sang mga driver bangud indi man full capacity ang ila nga mapasakay.
Sa pihak sini, magadepende naman sa LTFRB suno kay Ramos kun aprubahan ang hingyo sang transport groups.
Ang pamasahe naman sa tricycle ang ginatalana sang LGU.
