Ginkumpirmar sang provincial administrator sang Negros Occidental nga wala nagalapaw sa 6% ang positivity rate sang molecular lab sa Teresita Lopez Jalandoni Provincial Hospital.
Sa interview sang Bombo Radyo kay Atty. Rayfrando Diaz, ginpahayag sini nga wala pa nagdangat sa 100,000 ang kabug-usan nga napatigayon nga COVID-19 tests sa TLJPH kag mas gamay kun ikumparar sa molecular laboratory sang Corazon Locsin Montelibano Memorial Regional Hospital apang ini bangud bulan pa lang sang Mayo, nakasugod na ang CLMMRH sang testing.
Ginakabig man ni Diaz nga maayo nga butang nga nagapabilin sa 6% kag kun kaisa naganubo pa ang positivity rate sang molecular laboratory kag nagalaom nga masustain ini paagi sa pagsunod sang mga pumuluyo sa health protocols kaangay sang pagpanghugas sang kamot, pagsuksok sang face mask, face shield kag pag-obserbar sang social distancing.
Gindugang man sini nga indi under sa Department of Health ang laboratoryo bangud ang probinsya ang nagtukod sini.
Suno diri, apisar nga nagahatag sang consumable test kits, swab kits kag dugang nga manpower ang DOH kaangay sang mga medical technologist kag nurses, ang provincial government gid ang nagasuporta sa molecular lab bangud nakit-an ni Governor Eugenio Jose “Bong” Lacson nga dako ang mabulig sini sa pagcontain sang virus.
