Nagpanugyan ang personnel sang Public Order and Safety Office (POSO) nga nadeploy sa Burgos Public Cemetery nga mas maayo nga temprano pa magbisita sa mga minatay partikular na kun may dala nga kabataan ukon sa mga senior citizen.
Sa interview sang Bombo Radyo Bacolod kay Mark Gil Leonares, mas maayo nga temprano pa magbisita sa patyo samtang indi pa magutok.
Sila sa POSO ang shifting sa deployment kun sa diin sila ang magabantay sa sementeryo halin alas-6:00 sang aga tubtob alas-2:00 sang hapon.
Sila ang buslan sang masunod nga shift alas-2:00 sang hapon tubtob na alas-10:00 sang gab-i.
Paathag sini nga tubtob alas-10:00 sang gab-i lamang ang visiting hours sa mga public cemetery subong nga UNDAS 2025.
Sila ang nagabantay naman sa mga nagagwa kag sulod sa patyo.
Ginaseguro nila nga wala sang mapasulod nga alcoholic drinks, baraha ukon mga gamit sa pagpanahor kag deadly weapons.
Suno diri, kalabanan sa mga nagasulod sa sementeryo ang may dala lamang nga balde kag iban pa nga cleaning materials kaangay sang silhig nga bukog, pangiskis sang pinta kag gamit sa pagpaminta.
Wala paman ini sang nakita nga may dala sang espading, ilabi na nga sarang lang man mahunos ang mga hilamon kag balagon.
Dugang pa nga rasun kun ngaa mas maayo nga tempranuhan ang pagbisita sa sementeryo agud agud indi matam-an sang kainit ang mga tigulang kag kabataan nga matuga sang kagutok kasubong man malikawan ang madanlog nga pavement sang patyo bangod sa masami naga-ulan kun hapon kag gab-i.
