Tuman ang pagpasalamat sang isa ka post graduate agro student sa Israel nga hilway sila nga nakabalik sa Pilipinas matapos ang pag-atake sang Hamas.
Sa interview sang Bombo Radyo Bacolod kay Jheraldin Villan, nagatrabaho sa Romblon National Institute of Technology bilang administrative aid, sila ang nagatinir sa Ashkelon, siyam lang ka kilometros nagikan sa Gaza.
Suno sa iya, ang Technical Education and Skills Development Authority ang nagfacilitate sang ila nga pag-eskwela sa Israel sa sulod sang isa ka tuig apang shouldered na nila ang gasto.
Yara sila sa tour sa Jerusalem sang nag-atake ang Hamas militants sang Oktubre 7 gani wala nila nabatyagan ang una nga bahin sang pag-atake bangud malapit na ini sa northern part sang Israel.
Sang ila nakit-an ang missiles, nagpadulong na ang mga ini sa Tel Aviv kun sa diin sila magastopover antes magbali sa Ashkelon.
Bangud delikado na ang dalan pabalik sa Ashkelon, nastranded ang mga estudyante sa Tel Aviv.
Tuman naman ang ila pasalamat bangud may mga caregiver nga nagbulig sa ila sa Tel Aviv.
Sadto, missiles lang ang ginapalupad sang Hamas gani kampante pa ang mga ini bangud madamo ang mga bomb shelters sa palibot sang pungsod, apang ginhadlukan na ang mga ini sang nahibaluan nga may mga terorista na nga nagsulod sa ground kag nang-abduct ukon nangluthang sang mga pumuluyo.
Suno kay Villan, tuman ang ila kakulba sang nahibaluan nga may mga Pinoy nga gin-abduct gani wala na sila nagapadulong sa bomb shelters bisan may missiles kundi nagahapa nalang sila sa sulod sang ila nga flat.
Oktubre 11, natigayon ang flight sang mga agro students pabalik sa Pilipinas.
Samtang, sang Oktubre 10 pa kuntani ang flight sang masobra 50 ka Pinoy agro students nagikan sa Israel pabalik sa Pilipinas apang ini ang naatrasar bangud sa pag-atake sang Hamas sang Oktubre 7.
Suno kay Jheraldin Villan, nagatrabaho sa Romblon National Institute of Technology bilang administrative aid, wala sila nakabaton sang update kun kanselado ang ila nga flight tubtub sang Oktubre 9 gani kinahanglan nila magbalik sa ila nga ginatiniran sa Ashkelon nagikan sa Tel Aviv agud kuhaon ang ila mga gamit.
Bangud sini, napilitan sila nga magbalik sa Ashkelon paagi sa public transport bisan delikado kun sa diin diutay lang ang nagabyahe.
Masami naman sila nagabalik sa bomb shelters bangud madamo ang missiles nga ginpalupad sang Hamas militants.
Double security naman ang ila ginhimo kaangay sang paglock sang bintana, pagbutang sang mabug-at nga bagay sa pwertahan, paghipos kag pagpatay sang suga lakip na ang suga sang cellphone agud indi mahibaluan sang Hamas nga may tawo sa sulod.
Walo sanday Villan sa ila nga flat kag lunsay sila mga babayi nga agro students, apang ang iban sa ila ang mas nagpili nga indi nalang pag-ipahibalo sa ila pamilya ang nagakatabo agud nga indi sila pagkulbaan.
