Personal nga gin-inspection sang alkalde sang ciudad sang Bacolod ang dalan Araneta sa bahin sang Barangay Sincang-Airport, Bacolod City kahapon matapos nga natumba ang poste bangud nasagairan sang Trailer Truck.
Ginpadulungan mismo ni Bacolod City Mayor Greg Gasataya ang lugar kag gintawgan ang Bacolod Transportation and Traffic Management Department (BTTMD) agud nga mag-manage sang trapiko bangud nagtuga man sang mabug-at nga trapiko ang insidente.
Sa interview sang Bombo Radyo Bacolod kay Gasataya, gintawgan man sini ang mga telecommunication companies nga makakas anay ang mga kable sang mga ini nga naga-angot sa poste agud nga liwat nga mapatindog kag mahawanan ang lugar.
WATCH: https://youtu.be/uhFOnnckI3I
Suno kay Gasataya, gintinguhaan sang mga ini nga mapadasig ang pagkay-o sang natumba nga poste agud nga indi na magdugay kag maglaba pa ang trapiko sa dalan Araneta.
Ang trailer truck ang nagikan sa Bredco port kag naglabay sa nasambit nga dalan padulong sa South nga bahin sang probinsya.
Kagab-i, naobserbahan ang malaba nga trapiko kag may pila pa ka mga pasahero ang nadugayan nga makasakay apisar nga maagyan na ang dalan Araneta bangud magluwas sang natumba nga poste, rush hour pa kag sweldo man sang iban nga mga empleyado.
