Fully Energized na ang isla sang Negros, makaligad sang brown out kag fluctuations sang kuryente kahapon bangod sa ginpatuman nga emergency load dropping.
Sa interview sang Bombo Radyo Bacolod kay Michelle Visera, Regional Corporate Communication Officer sang National Grid Corporation of the Philippines (NGCP) Western Visayas, nagrquest sila sa Central Negros Electric Cooperative nga magpatuman sang manual load dropping bangod sa outage sang pila ka mga power plants alas-2:00 kahapon sang hapon.
Ini ang nakatuga sang power interruptions sa pila ka bahin sang franchise area sang CENECO, apang suno kay Visera, ini ang nakabulig sa pagpahagan-hagan sa problema sang power quantity kag malikawan nga magcollapse ang ila nga system.
Pahayag ni Visera nga 100 porsyento na nga nabalik ang supply sa Negros Island, apang wala pa nakabalik ang kabug-usan nga supply sa Panay island.
Bangod sini, ang sobra nga power supply sa Negros ang ginapadala na sa Panay, apang ini ang kulang gihapon sa konsumo sang tanan nga pumuluyo.
Paathag sini nga may-ara sang tatlo ka players sa power industry, nga ginalakipan sang mga power plants nga amo ang power supplier, ang NGCP nga nagaserbe highway kag system operator nga nagabalanse sang supply kag demand, kag Distribution Utilities kaangay sang CENECO nga amo ang nagasupply sa mga pamalay.
Suno diri ang tatlo ka players ang ulupod nga nagatrabaho, kag kun may-ara sang problema sa isa, ini ang may epekto gid sa mga konsumedor.
Kahapon, dulungan nga nagdown ang pila ka mga power plants kag nautod ang ila koneksyon sa NGCP, gani gilayon nga nag-abiso ang NGCP sa mga Distribution Utilities nga magpatuman sang emergency load dropping agud maproteksyonan ang ila nga mga system kag indi man maguba ang mga equipments kag appliances sang mga konsumedor.
Indi pa maseguro ni Visera kun mabalik na 100 percent ang power supply sa Panay subong nga adlaw bangod ini ang nakadepende sa supply sang kuryente nga mapasulod sang mga planta.
