Ginkumpirmar sang Regional Corporate Communication Officer sang National Grid Corporation of the Philippines (NGCP) Visayas nga normal na ang power supply sa Visayas grid.
Sa interview sang Bombo Radyo kay NGCP Visayas Regional Corporate Communication Officer Michelle Visera, sang Biyernes, nakabalik na ang pila ka mga dalagko nga power plants sa Mindanao kaangay sang Therma South, Inc. – Unit 1 kag GNPower Kauswagan – Unit 2 nga naguba sang tinalikdan nga Agosto nga nagtuga sang Yellow kag Red Alert status sa Visayas kag Mindanao grid.
Gani, naka-export na sang 450 Megawatt sa Visayas via Mindanao-Visayas Interconnection Project (MVIP).
Bangud sini, suno kay Visera, wala na sang ginalauman nga manual load dropping kag rotational brownout.
Nagalaum man ini nga mabalik ang PEDC Unit 3 agud mas dako pa gid ang kapasidad kag mag sige-sige na ang normal status sang power supply sa Visayas.
Sa pihak sini, ginpahayag ni Visera nga padayon sa gihapon ang pagmonitor sang NGCP sa demand kag supply sang kuryente sa Visayas.
