Gina-engganyo sang Malacañang ang mga power utilities nga pasanyugon ang mga programa batok sa nagapangawat sang kuryente matapos ginpaandaman ang mga ini sa pagkakas sang system loss charges gikan sa power bills.
Gin-athag ni Palace Press Officer Claire Castro nga luyag ni President Ferdinand Marcos Jr. nga kakason ang dugang nga palas-anon sang mga konsumer sa ila nga bills apang wala man sang katuyuan nga ipasa sa mga utility companies ang nasambit nga gastos.
Ginpahayag ni Castro nga ang utility companies ang dapat mangin efficient sa pagpanubo sang losses gikan sa pagpangawat samtang ginatun-an man sang gobyerno kung paano makaapekto sa energy sector ang ginaduso nga pagkakas sang balayran sa electric bill para sa system loss.
Gin-athag sang Department of Energy nga ang proposal sang presidente ang nagasakop lamang sang system loss charges kag 12 percent VAT sini kag indi ang bug-os nga VAT sang electric consumption.
